|
Publicidade
Contacto
Novas
Opinión
Arquivo
Ligazóns
Anteriores
|
*Os
C.A.E. opóñense ao anteproxecto de Lei Orgánica
de Educación presentado polo goberno do PSOE
Redacción,
2 de abril 2005.
Os Comités Abertos de Estudantes, como organización
máis representativa nos centros de ensino medio de Galiza,
cren que este proxecto non contribuirá a solucionar os
problemas e deficiencias do ensino público galego, senón
que os agravará, pois boa parte das "novidades"
que contén son claramente regresivas, moitas das cales
poderían ser perfectamente asumidas polo anterior goberno
do PP.
Os C.A.E. queren
denunciar
“a hipocresía do PSOE que asume boa parte dos
contidos da Lei de Calidade para a súa propia reforma”.
Poñen por exemplo, o anúncio da supresión dos
itinerarios, ainda que estes existirán na práctica
en 4º de ESO (dividirase aos alumnos entre os destinados a
F.P. e a Bacharelato) e mesmo antes, cando se di que poderán
desdobrarse grupos en diferentes aulas con distintos niveis,
apostando, de novo, pola segregación, aseguran. Implántanse
tamén dúas reválidas (aos 10 e aos 14 anos),
teoricamente sen valor académico, e mantense a
selectividade, que mesmo podería endurecerse ainda máis.
Outro dos aspectos nos que o actual goberno se identifica
co seu antecesor é no seu compromiso co ensino concertado,
que seguirá a ser enormente subvencionado e gozará
ainda de máis vantaxes por parte da administración,
segundo indican os C.A.E.
Estes opoñense tamén a
que se siga a obrigar aos centros públicos a ofertar a
materia de relixión, contradicindo a suposta
aconfesionalidade do Estado e servindo os intereses dunha
determinada institución relixiosa, en concreto a Igrexa
Católica. No entanto, segue sen definirse cal será a
alternativa a esta "materia" e se esta alternativa será
evaluábel. Outro dos aspectos máis controvertidos da
LOCE, como a elección dos directores pola administración,
mantense na práctica, e mesmo o baleirado de competencias
do Consello Escolar en favor da persoa do director tamén é
asumido polo actual goberno, indican, potenciando así un
modelo de xestión nos centros máis autoritario e
menos democrático ainda. Tamén como no caso da LOCE,
botan en falta de novo un Plano Extraordinario de Financiamento
que acompañe este reforma.
Por último,
denuncian unha nova recentralización educativa, pois as
novas reválidas serán un exame común a todo o
Estado (co que se uniformizarán os temarios), e ademais coa
desculpa de "potenciar a cohesión territorial"
volveranse invadir competencias autonómicas para promover
un modelo de ensino ainda máis desgaleguizador. Ante isto,
fan un chamamento ao estudantado galego a organizarse contra esta
nova agresión, e anuncian que volveran sair á rúa
de non ser amplamente modificado este anteproxecto e se seguen a
obviarse as demandas do estudantado do noso país por un
ensino galego, público, democrático e de
calidade.
Voltar
a novas
Ver
anteriores
|
|