*ADEGA valora positivamente a creación da Confederación Hidrográfica do Miño

Redacción, 7 de abril 2005.A Asociación para a Defensa Ecolóxica de Galiza (ADEGA) valora positivamente a moción do Senado adoptada a proposta do senador Anxo Quintana na que se insta ao Goberno “á creación dun novo organismo de conca, coa denominación de Confederación Hidrográfica do Miño, que abranga como ámbito territorial as bacías hidrográficas dos ríos Miño-Sil e a parte galega do Limia”.Para ADEGA, tan importante como a súa creación é que a nova confederación asuma outra cultura en relación á planificación e á xestión hidrolóxica acorde cos principios do desenvolvemento sostíbel e coa Directiva europea Marco da Auga.

Como asociación ecoloxista seguiremos reclamando outra sensibilidade e outra cultura en relación á planificación e á xestión hidrolóxica na que, -tal e como se propón na Iniciativa Lexislativa Popular (ILP) en defensa dos ríos para a que se están a recoller sinaturas en toda Galicia-, “a conservación do patrimonio natural fluvial, incluíndo a biodiversidade de flora e fauna dos ríos galegos, así como o patrimonio etnográfico e histórico-cultural relacionado” sexa unha “clara prioridade de interese xeral”.

ADEGA reclama que na Confederación Hidrográfica do Miño haxa unha representación adecuada dos usuarios interesados na conservación do patrimonio dos ríos e na xestión sostíbel da auga e que non sexan as empresas eléctricas e as construturas as que determinen a súa política. Debe prevaler o interese xeral sobre o negocio privado.

ADEGA entende tamén que se debe producir canto antes a transferencia íntegra á Xunta de todas as competencias sobre os ríos e as bacías de Galicia. E non só porque Galicia teña o mesmo dereito que Cataluña a estas competencias, senón tamén porque, en primeiro lugar, resulta totalmente irracional (e, en moitos casos, até inxusto) que no mesmo territorio poida haber criterios e modelos dispares á hora da planificación e da xestión hidrolóxica: Galicia-Costa, por un lado; e o Miño, o Sil, o Navia, o Eo, o Limia ou o Támega, por outro.

Na ILP en defensa dos ríos, que ADEGA está a impulsar xunto con outras organizacións, inclúese unha disposición transitoria que establece que “a Xunta xestionará a transferencia para Galiza das competencias en materia de planificación hidrolóxica nas bacías dos sistemas Miño-Sil, Limia e Támega, como paso previo á configuración das correspondentes demarcacións territoriais nas que deberá participar o Minho e o Douro portugués”. (O Támega é afluente do Douro).

A creación da nova confederación ten todo o sentido xa que a realidade da bacía Miño-Sil é ben diferente á do resto das concas do norte de España. Isto condiciona que, por exemplo, se se trata de aproveitamentos hidroeléctricos, nada de sustentábel e de xusto pode ter que teñamos que seguir sacrificando o que queda de mellor conservado dos nosos ríos cando os nosos ríos, os nosos montes, o noso solo e o noso aire xa teñen pagado impactos dabondo. Ou se se trata de protección e impactos ambientais, nada que ver a xestión dos ríos do resto das concas do Norte cos daquelas que, coma no caso de Galiza, depende a riqueza pesqueira das nosas rías e boa parte da produción das terras agrarias.

Voltar a novas

Ver anteriores