|
Publicidade
Contacto
Novas
Opinión
Arquivo
Ligazóns
Anteriores
|
*Anxo
Quintana demanda ao PSOE que se una ao BNG na
defensa do direito dos galegos e galegas a coñecer a
verdade sobre as infraestruturas
Redacción,
11 de abril 2005. O líder
do BNG
pensa que un debate na TVG sería o formato ideal para que
os galegos coñecesen por que os sucesivos gobernos centrais
non atenden as necesidades do país. “Caso de que
Fraga non quixese acudir, sería útil que debatísemos
Touriño e eu sobre as infraestruturas para chegar a un
compromiso de propaganda cero” afirma.
O
líder do Bloque Nacionalista Galego, Anxo Quintana, demanda
ao PSOE que se una á formación nacionalista na
defensa do direito dos galegos a coñecer a verdade sobre as
infraestruturas.
“Abonda
de tanta mentira e de tanta propaganda. Este goberno discrimina a
Galiza, pero non máis do que a discriminou o Goberno Aznar
ou do que a discrimina o proprio Goberno Fraga, incapaz de cumprir
coa súa parte do chamado Plan Galiza”, di Quintana
através deste comunicado de imprensa.
“Do que
se trata agora é, por tanto, de cesar coa propaganda e coas
mentiras. Os galegos teñen o direito a coñecer a
verdade. A saber por que o Goberno Aznar non comprometeu o
financiamento necesario para levar a termo o Plan Galiza. A saber
por que o Goberno Zapatero se limita a facer unha xestión
continuista en materia de infraestruturas galegas. A saber por que
Fraga censura agora aquilo que non criticou durante oito anos”,
di Quintana.
O portavoz nacional do BNG chama ao PSOE para
que “abandone a vía da propaganda” e “comunique
á nosa sociedade a verdade dos feitos”. “A nosa
sociedade é unha sociedade madura. Abonda xa de tratala
como se for menor de idade. É evidente que este Goberno non
vai cumprir cos prazos aos que se comprometeu no Congreso dos
Deputados. É evidente que a Xunta de Galiza tampouco está
a cumprir co Plano de Dinamización Económica. Nesta
situación, o BNG é a única forza que di hoxe
o que dicía onte: que a política dos sucesivos
gobernos centrais sobre as infraestruturas galegas ten sido unha
política virtual, non real. E o noso obxectivo é que
isto mude nos próximos meses”.
Quintana
considera que o formato ideal para informar aos cidadáns
sobre esta cuestión é un debate na TVG entre os
líderes das tres forzas políticas. E introduce un
matiz: “Caso de que Fraga non queira acudir, penso que sería
útil que debatísemos Touriño e eu sobre este
asunto e que do debate saíse como compromiso o de
propaganda cero sobre as infraestruturas galegas. E desde logo
agardo que o secretario xeral do PSdeG non vexa nesta miña
proposta nengún desafío. É simplesmente unha
oferta leal e honesta para defender o direito de todos a sermos
verazmente informados sobre aqueles asuntos que nos afectan”.
Por
que Fraga teima en non debater? “Porque non está en
condicións nen de debater nen de gobernar. Fraga é
hoxe un precandidato que só está en condicións
de dar algunha que outra rolda de prensa. Non está xa para
os duros e exixentes compromisos da política de primeiro
nível. E o pior é que non estamos a falar dun
político calquer, estamos a falar do presidente do Goberno
galego”, afirma Quintana.
Voltar
a novas
Ver
anteriores
|
|