*Quintana anuncia que desde a presidencia da Xunta porá en marcha o proxecto “Galiza emprendedora 2005-2009”, para emprestar apoio a emprendedores e autónomos

Redacción, 14 de abril 2005. A Fraga: “Que deixe de chamar ladróns aos demais, é el quen está a roubar o soño de moita xente ao usar fundos públicos non en criar riqueza, senón en financiar a súa campaña eleitoral para lograr unha reelección que, se poña como se poña, ten imposíbel”.
O BNG vai pór en marcha desde a presidencia da Xunta de Galiza, apartir do próximo mes de Outubro, o proxecto “Galiza Emprendedora 2005-2009”, un programa para emprestar apoio a emprendedores e autónomos, anunciou hoxe o portavoz nacional da formación nacionalista, Anxo Quintana.

Quintana, quen se entrevistou na mañá de onte cunha representación da directiva da Unión de Profesionais e Traballadores Autónomos (UPTA), está convencido do enorme potencial de criazón de riqueza “que teñen os emprendedores galegos”. “Só hai que emprestarlle apoio desde a Administración Pública, unha Administración pública que estea ao servizo da sociedade e que non a parasite, como a actual”, afirma o portavoz nacional.

O proxecto 2005-2009 operará sobre tres eixos: o primeiro pasa pola criazón dunha entidade administrativa especial que terá como nome “Galiza Emprendedora” e coa que a Administración pública financiará, coparticipará e xestionará iniciativas de desenvolvimento e innovación tecnolóxica e comercial dos emprendedores, nomeadamente mulleres e menores de 35 anos. Un segundo aspecto central será a criazón de liñas de apoio económico directo, a meio de créditos brandos e incentivos fiscais. Por último, o Goberno galego presidido por Anxo Quintana promoverá unha Carta de Servizos Aos Emprendedores, que complementará o Estatuto dos Traballadores Autónomos que elabora o Goberno do Estado, e que terá como obxectivo a mellora da cobertura social dos autónomos e emprendedores.

“Hai unha Galiza que acredita no futuro e que cría riqueza e outra que representa o pasado e que personifica o Goberno Galego. Fraga ten que deixar de chamar ladróns aos demais, é el quen está a roubar os soños de moita xente. Fraga emprega os cartos públicos non en financiar políticas eficientes que críen riqueza, senón en financiar a súa campaña eleitoral para unha reelección que, se poña como se poña, ten imposíbel”, acrecenta o portavoz nacional do Bloque Nacionalista Galego.

Voltar a novas

Ver anteriores