Galiza
Nova ante o Plano de Transposte Metropolitano
*Galiza
Nova da comarca da Coruña exixe un transporte público
axeitado ás necesidades da xente e non
excluinte.
Redacción,
18 de marzo 2005. O Plano
de Transporte Metropolitano asinado en días pasados pola
Xunta e os concellos de Arteixo, Cambre, Culleredo, Oleiros e A
Coruña é calificado de insuficiente e excluínte
por Galiza
Nova (organización
das mocidades do BNG)
da comarca coruñesa. Para darlle resposta a este Plano
durante as vindeiras semanas levaran adiante unha campaña
informativa e reivindicativa baixo o título
“Plano
de Transporte Comarcal: Insuficiente. A mocidade quere solucións”
na que exixirán un
verdadeiro transporte público de carácter comarcal,
ecoloxicamente sustentábel, axeitado ás necesidades
reais de desprazamento da xente da Comarca e non excluinte nin a
respecto de determinados municipios nin a respecto de
determinados sectores sociais.
Neste
sentido, Galiza Nova da Comarca da Coruña cualifica o novo
Plano de abertamente insuficiente, incompleto e inconcreto e
demanda medidas de aplicación urxente para encarreirar o
século XXI en materia de transporte na Comarca, unha das
máis densamente poboadas da Galiza e unha das máis
caóticas no que a circulación de vehículos
se refire, situación agravada por unhas infraestruturas
viarias claramente insuficientes. Se ben a existencia dun Plano
como o asinado é positivo porque arroxa luz sobre un
panorama historicamente desastroso no que a transporte se refire
e tamén o é a aplicación dun Billete Único
que permite un desconto do 40% no prezo das viaxes, segue sendo
necesario facer muito máis.
Galiza
Nova centra as súas críticas preferentemente en
dous aspectos: a exclusión do Plano de determinados
concellos hoxe intregrados pola vía dos feitos na Área
Metrolitana e cunha densidade poboacional en ascenso (Sada,
Bergondo, Abegondo e mesmo Betanzos) e a dun sector social como o
da mocidade, cunhas necesidades específicas en materia de
transporte que non son atendidas. Especialmente criticábel
é que este Plano volte a deixar fóra o transporte
universitario, e especialmente a creación de liñas
de transporte con horarios e frecuencias específicos que
intercomuniquen os campus universitarios cos concellos da
Comarca, cando menos cos núcleos poboacionais maiores.
Unha das “propostas estrela” de Galiza Nova é,
con respecto á mocidade, a creación dunha
denominada “tarifa plana xuvenil” común a
buses e trens que permitiría as usuarias e usuarios máis
novos viaxar a prezo reducido.
Tamén se reivindica
na campaña unha clásica demanda do nacionalismo na
comarca coruñesa: a creación de servizos
ferroviarios de proximidade aproveitando as liñas xa
existentes (corredor A Coruña-Betanzos-Ferrol e corredor A
Coruña-Lugo) e mesmo o estudo de liñas novas.
Recórdase que a Comarca da Coruña é das
pouquísimas do Estado que cunha densidade poboacional
semellante non contan con este tipo de ferrocarril e rexéitase
que o servizo sexa “pouco ou nada rendíbel”,
como argumenta o Ministerio de Fomento español unha e
outra vez. Dous dos actos que Galiza Nova desenvolverá
serán unha viaxe reivindicativa a Cambre en tren desde A
Coruña seguida dunha charla nesta vila co Deputado do BNG
Francisco Rodríguez, autor de innumerábeis
iniciativas parlamentares en materia de transporte público,
e unha homenaxe cívica ao tren como acto de feche de
campaña.
Participa!
Desta volta gañamos nós!!!!
Colabora
coa Mesa, clica embaixo e axúdanos a galeguizar os bancos
e caixas de aforros!