*O BNG mostra a súa ledicia pola concesión do Pedrón de Ouro a Xosé Manuel Beiras

Redacción, 24 de abril 2005. A Executiva Nacional do Bloque Nacionalista Galego amostra a súa satisfacción pola concesión do Pedrón de Ouro a Xosé Manuel Beiras.

Esta distinción subliña a condición de Xosé Manuel Beiras como referente do nacionalismo galego e como persoa fondamente comprometida co avanzo de Galiza cara o seu pleno autogoberno nacional.

Resulta fóra de toda discusión, como á súa vez subliña a propria Fundación do Pedrón, a achega de Xosé Manuel Beiras á defensa e promoción da identidade, cultura e língua de Galiza e o seu contributo á formación dunha opinión pública no país claramente favorábel a que Galiza teña outro papel institucional no Estado e sexa cada día máis dona de si propria.

Ao premiar a súa traxectoria, o Pedrón de Ouro premia tamén a do nacionalismo galego nas últimas décadas, a forza que representa os anceios de máis autogoberno que neste momento ten a grande maioría do noso pobo.

Voltar a novas

Ver anteriores