Arroz con perdiz

Límpase a perdiz, (ou outra ave de caza, como o paspallás ou o pombo), e déixase como mínimo un día ó sereno (colgada nun sitio fresco ou na neveira). Se non temos caza, o máis doado de conseguir é o paspallás de granxa, que tamén está bon, e non precisa de poñelo ó sereno. Pícase a ave en anacos tirando a pequenos, sálgase e adubase con especias ó gusto (pementa moída e "tomiño" ou ourego).

Pícanse cebola, allo e pemento (verde ou rubio, ou dos dous). Nunha pota baixa e ancha bótase aceite e dóuranse a ave, a lume lento e con coidado de que non pegue, e cando tome cor engádense e os vexetais (a razón de botalos un pouco despois da carne é que esta frita un pouquiño no aceite antes de que a abranden os vexetais, co que estará máis pasada e terá unha textura máis firme). Cando todo isto estea refogado (a cebola e o allo estean dourados, pero sen que se queimen), bótase o arroz e remécese ben. Neste momento tamén se poden botar uns chícharos (conxelados, ou frescos previamente bullados e escaldados). Agárdase un minutiño, e engádese auga ou caldo de polo ou pita (na proporción habitual 2´5 ou 3 partes de auga por parte de arroz, no segundo caso non quedará seco de todo, incluso se pode deixar un nada caldoso, que hai quen o prefire así). Faise a lume medio-baixo durante uns 20 minutos. A media cocción próbase e rectifícase de sal, e engádense unhas febras de azafrán. Despois de apagado o lume deixase repousar uns minutos antes de servir.

Cultura (Lingua,
personaxes, etnografía...)

Valdoneira 2002-3