Poñemos o bacallao, a ser posible do gordo, en cachos que tendan
a grandes, e desalgámolo en abundante auga, aproximadamente
dous días, cambiándolle a auga varias veces. O punto
de desalgado é ó gusto de cada quen, pero nesta zona
tende a preferirse cun pouco de sal (quizais polo hábito de
comer o porco salgado).
A preparación ven sendo o que na costa chaman "caldeirada":
Nunha pota con abundante auga, botamos unha pouca cebola, picada en
aros, e patacas cortadas en toros (duns dous ou tres cm. de gordos),
e poñémolo a cocer. Cando estean a medio facer (uns
dez minutos) engadimos o bacallao e deixamos ferver outros dez ou
quince minutos, segundo sexa de gordo. Escorremos ben, incluso se
pode poñer de novo a pota no lume un minutiño para que
evaporen os restos de auga, (o mesmo se pode facer coas patacas cocidas
ou cachelos, que melloran así de sabor e presentación),
aínda que haxa quen o fai deixando unha pouquiña pouca
auga no fondo, xeralmente prefírese ben seco, sendo o máis
propio desta receita escorrer o líquido concienzudamente.
Por último reparamos o refrito: nunha tixola con abundante
aceite douramos uns allos, picados en filetes, retiramos do lume e
engadimos pemento doce (hai quen engade tamén un pouco do picante).
Colocamos nunha fonte ampla o contido da pota, vertemos o refrito
por riba, e servimos antes de que arrefríe.
