Caldo de costelas, miolos e ósos da matanza

Este é un caldo "branco" (sen verdura), que se fai con ósos (sobre todo costelas, tamén outros restos ou anaquiños de óso con carne pegada que quedan ó "desapartir" o animal) e miolos (os "sesos") do porco. Estes ingredientes fan que sexa un caldo propio da matanza ou dos días inmediatamente posteriores.

Preparación:
Ponse a cocer unha cunca de fabas brancas (previamente tivéronse a remollo, claro).

Escáldanse en auga fervendo as costelas e os miolos, estes despois de lavalos e de quitarlles as veíñas de sangue. Escórrese e pícanse un pouco os miolos, incorpóranse xunto coas costelas á pota onde cocen as fabas. Bótase a continuación media cebola picada gorda, unha folla loureiro e perexil picado, hai quen engadetamén zenoria e allo porro. E sálgase.

Cando leven unha hora ou algo máis cocendo, bótase pataca picada pequena, e deixase seguir cocendo ata que estean as fabas (outra media hora ou tres cuartos).

Finalmente engádeselle un rustrido de aceite, un dente de allo picado, fariña, e pemento doce e picante, e deixase que ferva outros cinco minutos.

Cultura (Lingua,
personaxes, etnografía...)

Valdoneira 2002-3