Carne á maragata

A carne á maragata é como aquí se lle chama á carne fresca cocida, ou "ó caldeiro". A denominación responde á preparación que facían os Maragatos, eses arrieiros bercianos que monopolizaban o transporte cara á meseta e tiñan nestas terras habitual lugar de paso. Os maragatos gustaban desta preparación por sinxela e doada de facer en calquera lado, mesmo nun alto no camiño, pois, amais dos ingredientes, non se precisa doutra cousa que un lume, auga e unha pota. A receita ven sendo semellante ó "Pulpo á feira" e máis ó "Coligón".

Ingredientes: carne fresca de becerro (tenreira), pola parte da falda, e que sexa "entrefebrada", con esas telazas de sebo por entre a febra que a fan máis xugosa; patacas; aceite de oliva; sal gordo; e pemento picante.

Preparación: Cócese a carne, en auga con sal, pero non moito, que se lle bota tamén no adobado, (pódese botar tamén unha media folliña de loureiro, pero xeralmente prescíndese), terá que cocer uns corenta minutos, segundo tamaño e clase da carne, así que cando leve uns vinte xúntanselle as patacas, estonadas e picadas grandes, para que estea todo feito ó mesmo tempo.

Escórrese, sérvense nos pratos carne e patacas, e adóbase individualmente con sal gordo, aceite de oliva, e pemento picante, todo coas cantidades ó gusto de cada quen.

 

Cultura (Lingua,
personaxes, etnografía...)

Valdoneira 2002-3