 |
|||
|
A
web do val do río Neira
|
RECEITAS:
CASTAÑAS
|
(A
gastronomía: receitas)
|
|
 |
Receitas con castañas Caldo de castañas: Pódese facer con castañas "frescas" (no outono, neste caso chámaselle caldo "do bugallo" ou "burgacio"), ou con castañas secas (esas que noutras zonas chaman "pilongas", estas consérvanse, e pode facerse todo o ano). Póñense a cocer as castañas en auga cun chisco de sal, (ben estonadas, se son do bugallo dáselles unha escaldadura previa para quitarlles a segunda pel). Pasados 20 ou 30 minutos (dependendo de se son frescas ou secas) engádese na pota un pouco leite, tamén se lles pode botar unha pouca manteiga. Nunha tixola bótase graxa de porco ou aceite, eslúese nela unha pouca fariña e tórrase a lume baixo. Engádese pemento doce ("pimentón") e un chisco do picante (ó gusto de cada quen). Envórcase o refrito no caldo e deixase seguir cocendo ata que as castañas estean ben cocidas e a auga espese en pouco. Unha variante é que leve tamén carne. O máis práctico é poñer a cocer coas castañas uns anaquiños picados de touciño entrefebrado, ou de xamón. Se se fai isto hai que telo en conta á hora de salgar, pois aportarán case todo o sal necesario. Castañas asadas: "o magosto" (ou "bullós")
é con moito a preparación máis habitual das castañas,
e non ten maior misterio: "amozcar" as castañas (facerlles
ese pequeno corte que impide que rebenten ó asarse), e asalas
na beira das brasas, sobre a prancha da cociña de ferro, nunha
tixola con buratos, no forno… Castañas cocidas con carne (cachola, touciño...): fanse coma o caldo, cun fervido previo para rematar de estonalas e un remate de cocción xunto coa carne, que terá que estar cocendo de antes (unha hora e pico) para que estea feita, e cómese todo escorrido.
|
|
|
|
|||
|
|||
|
|||
|
|||
|
|||
|
|||
|
|||
|
|
|||
 Valdoneira 2002-3 |
