Esta é outra receita propia da matanza, que é cando hai fígado de porco. Como receita non ten misterio ningún, é coma a de moitos outros sitios.

Dourase en aceite (ou graxa de cocho) cebola e allo abundantes, picados finos. Engádese o fígado, picado en anacos, cunha folla de loureiro, perexil picado, e sal. Refógase todo xunto, a lume baixo, uns minutos. Engádeselle un chorro de viño (que xeralmente é tinto, e non lle queda mal), aínda que hai quen o substitúe por un chorriño pequeno de coñac e auga, deixase seguir guisando outros 20-25 minutos (ou máis se o precisa, próbase ou téntase cun garfo para sabelo).

Cando xa estea feito zarrapícaselle un pouco pemento picante.

Aparte, fanse cachelos, (que nesta terra son patacas cocidas estonadas e picadas en toros gordos, non coma onde lle chaman cachelos só cando son enteiras e sen estonar). Tamén pode acompañarse de patacas fritidas, pero é menos común.

Sérvense xuntos, coa salsa do guiso por riba das patacas.