A preparación das "papas" é moi sinxela, pero esixe moito tino no punto de cocción, que é o que lle dá todo o mérito. Comézase por esluír en auga fría unha pouca fariña, que pode ser de millo ou de trigo (non se fan de centeo xeralmente), desfacéndoa ben para que non teña "grumos". Engádeselle leite e auga máis ou menos a partes iguais, unha pizca de sal, (e opcionalmente uns grans de arroz), e ponse a cocer. Pode botárselle tamén unha cullerada de manteiga de vaca (ou incluso de graxa de porco).

Cócese por termo de unha media hora, ata que espese, (de facelo antes deste tempo engadimos máis auga e leite). Hai que estar remecendo constantemente para que non se apeguen, pero, e aquí está o "misterio" de preparación, convén que torre un pouquiño, sen que saiba a queimado, pero si cun nada pegado.

Á hora de servilas pode engadírselles un pouco leite cru, e hai incluso que lles botaba mel por riba, pero iso xa é para gustos.