Chulas: faise unha masa solta, por dar unhas cantidades e proporcións, poñamos que para 2 ovos, ¼ l. de leite, ¼ l. de auga, e fariña segundo se precise, esta vaise botando ata ter a consistencia adecuada, debe quedar unha masa solta, non líquida pero abondo como para collela cunha culler. Vértense as culleradas en abundante aceite ben quente e frítense.

Normalmente son doces, e espolvoréaselles azucre namais quitalas da tixola, pero tamén hai unha variante salgadas, que se fai engadindo á masa ingredientes coma se fosen croquetas, pode ser migas de bacallao, tacos xamón picadiños, bonito… e non se lles bota azucre, claro.

"Rosquillas" ou "roscas": faise unha masa con fariña, ovo, unha pouquiña auga, un pouquiño aceite ou graxa, azucre, e raspadura de limón ou anís. As cantidades serán as que nos demande a consistencia da masa (darállela a proporción fariña/ovo, pois a auga e o aceite son só un chorriño de cada) e a experiencia de facelas. Debe ser unha masa elástica e que se deixe traballar. Logo pártese a masa en anaquiños, póñense estes en cilindros ou "tiras" e "enrólanse" dándolles a forma característica de rosquillas, e frítense en aceite limpo ben quente. Unha vez ecorridas espolvoréaselles máis azucre.

Polvoróns: mestúrase azucre e fariña a partes iguais, trabállase con graxa de porco (a necesaria que vaiamos vendo, úsanse as mans, e coa calor destas a graxa derrete un nada e mestúrase co azucre e a fariña) ata ter unha masa elástica e doada de moldear. Fanse unhas boliñas como de 3 centímetros de diámetro, achátanse un pouco e póñense sobre uns papeliños ou directamente nunha bandexa. Métense ó forno con lume medio, vixiando de que non se queimen, o tempo depende moito do tamaño dos polvoróns e a temperatura do forno, co que non queda outra que vixialos, e cando tomen cor e endurezan xa están.

Cultura (Lingua,
personaxes, etnografía...)

Valdoneira 2002-3