A web do val do río Neira
RECEITAS: TROITAS EN ESCABECHE
(A gastronomía: receitas)

Troitas en escabeche

Límpanse as troitas, quítaselles a cabeza, e de seren grandes fanse dous filetes de cada unha, quitando a argana central.

Logo sálganse e frítense. Antigamente o fritido facíase en graxa de porco, e son ben sabidas (véxase a preparación "troitas fritidas con unto", pois poden facerse parecido, pero para o escabeche non se torran tanto), o difícil é dispor da graxa, e quizais resulten fortes da máis para quen non estea afeito. O normal hoxe é, en calquera caso, usar aceite de oliva.

Despois, nunha tixola limpa, aproveitando o aceite de fritir o peixe, se non está moi queimado, e con coidado de que vaia limpo, ou ben (e isto seguramente é mellor idea) con aceite novo, dóuranse uns aros de cebola e uns dentes de allo en filetes. Engádese unha folla de loureiro, ou dúas, e logo con coidado, pois salta, o vinagre. Nas cantidades cada quen ten o seu gusto, e tamén hai vinagres máis fortes e máis frouxos, por dicir algo poñamos que unha parte de vinagre por dúas de aceite, para os que non gusten moito do vinagre, pois menos, ou tamén se pode rebaixar con viño branco ou zume de limón. Agárdase a que ferva de novo, déixase un minuto ou dous, retírase do lume e bótase unha cullerada de pemento doce.

Por último, vanse colocando nun recipiente axeitado, que pode ser de barro, capas de troita e capas da cebola e allo, e regando co líquido ata telo colocado todo. Deben quedar cubertas por completo, para que se conserven, e farano máis dunha semana.

Pódense comer acompañadas de patacas cocidas, que serán regadas co líquido do escabeche a modo de prebe.

 

 

 
 

 

 

 

 

 

 

 

 

 

   
Volver a "Páxina inicio Valdoneira".
Volver a sección: "Peixes"

Valdoneira 2002-3